Augmentation of Greater Mamit Water Supply Scheme Part - II (Clear Water) hna thawh mek chu zawh fel a la ni lo a, hnathawh hun chhung pawh sei dilna hnathawktu Company ten Departmentah an thlen leh a, thutlukna siam a la ni lo.
Augmentation of Greater Mamit Water Supply Scheme Part - II (Clear Water) hna hi DoNER hnuai, North East Special Infrastructure Development scheme (NESIDS) atanga pawisa hmuh Rs 40Cr hmangin Gangwal Infrastructure Pvt Ltd ten an thawk a, Ni 4/10/2022 atang khan hna tan a ni a, hna zawng zawng hi thla 24 chhunga thawh zawh tura tih a nih laiin zawh hman a ni lo a, April 2025 thleng hna thawh hun chhung pawhsei sak an ni. Heti chung hna hi zawh fel a la ni lo a, tunah hian hnathawh hun chhung December 2025 thlenga pawh sei dilna department hnenah company hian a thlen leh mek a ni.
Hemi chungchanga Mamit Times zawhna chhangin Pi Helen Saibuangi, Sr. EE PHED Mamit chuan tunah hian Phaizau atanga Mamita tui pump chhuahna tur kawng (Pipe line) zawh fel a nih tawh thu a sawi a, tui pump-na tura hmaraw pawimawh a la thlen kim loh vanga tui pump theih a la nih loh thu a sawi. Tui pump na tura hmanruate hi DPR a ruahman sa aia chak zawk duhna avangin hmalakna a kal muang deuh a, hei vang hian khawl a thleng kim har tih a sawi. Pump khawl hi May Ni 14/2025 aia tlai loah a thlen kim theih an beisei tih Pi Heleni chuan a sawi bawk.
Main Reservoir atanga khaw chhunga pek kualna tur pipe line phum hna zawh fel a la ni lo bawk a, hei hi PWD te nena zai inngai tawna thawh ngai a nih avangin duh ang leh beisei angin a chak thei lo tih Sr. EE chuan a sawi a ni.
Hnathawktu ten hna tawh hun chhung pawhsei an dil chungchangah, Pi Heleni chuan hna a chak tawk loh chhante ngaihtuahin phalsak loh ngawt theih nia a hriat loh thu a sawi a, fur khuaah hna a khaihlak thin avanga kumin chhung dilna an thlen pawh awm a tih thu a sawi.
Hetihlai hian, Tut tui pump mai thei tura inbuatsaihna erawh ngawrh taka kalpui a ni a, AGMWSS Part-I (Raw Water) hnathawh zawh tawh, Tut lui khuahna dum leh tiauin a hnawh pawh contractor hmasa ten an thian fai tawh a, Khawl a thlen kima remkhawm fel a nih chuan Tut tui pump mai theih beisei a ni.
Tut Tui pump chhuahna tura hna hmasa - Augmentation of Greater Mamit Water Sypply Scheme Part-I (Raw Water) hnathawh chu zawh zawh a nikh hnuin Ni 6/7/2022 khan hlawhtling taka pump chhin a lo ni tawh a ni.
0 Comments