Mamit District Jail a tang lai (Convict) mipa pahnih chu Vawiin Ni 27/3/2025 khan Mamit District Jail atangin an tlan chhuak a, he thu buatsaih lai thleng hian man leh an la ni lo.
Mamit District Jail a tang lai mi pahnih - Alex R. Vanlalhruaia (30) S/o R. Tlanglawma Chhinga veng Aizawl, In rawk vanga kum 2023 a man, kum hnih leh tha hnih chhung tang tura convict leh Malsawmlawmpuia (25) S/o Hmingthansanga, Bazarveng Mamit, rukruk avanga kum 2024a man, thla ruk chhung tang tura convict te chu vawiin Ni 27/3/2025 (Ningani) tlai lam dar 3 vel khan an tlan chhuak a, he thu buatsaih lai thleng hian man leh an la ni lo.
Heng mi pahnih, Mamit District Jail atanga tlan chhuakte hi vawiin Ni 27/3/2025 khan an hnathawhna (thingtuah an lakna) atanga tlan chhuakin Jail Complex chhunga bike pakhat Phoenix (TVS) Registration No MZ 08-3070 (rawng sen) chu an ru chhuak bawk a, Mamit khaw chhungah lutin tlai dar 3:30 vel khan Mamit field venga an hmel hriatte tlawhin pawisa an dil tih hriat a ni a, heta tanga an chhuah leh hnu hian an chin hriat zui a ni ta lo a ni.
He thil thleng avang hian Mamit Police Station ah F.I.R thehluh a ni a, Case ziah luh a ni. Police Station hrang hrang leh khaw thenawm hnenah hriattir an ni tawh a, ngawrh taka zawn mek an ni.
0 Comments