Ni 9/4/2024 Thawhlehni zinga bungrua engmah chuh hman loha kangral ta, Pi Lungtiawii In, Mamit Dinthar veng ami chu Hmarveng Branch YMA ruahmanna angin sak hna ngawrh taka thawh mek a ni a, Inrinni kalta Ni 4.5.2024 khan Insak bul tan nan Hmarveng branch YMA chuan hnatlangpui koin thawh a ni a, nimin Thawhtanni khan Hmarveng Branch YMA huam chhung ami Chawngbawla Section an hnatlang a, vawiinah Taitesena Section hnatlang leh in naktukah Vanapa Section an hnatlang ang.
In hi a dung 24ft leh a vang 18ft a sak niin Varanda 4ft a zau siam a ni a, bathroom tur ruahman nghal a ni bawk. He thu buatsaih lai thleng hian In hi a chung (Rangva) chih zawh tawh niin a chhuat (Thingphel) phah tawh a ni. A hnuai siam theih tura ruahman niin hei erawh hnatlanga khawih zui a ni lo thung ang.
Pi Lungtiawii In sakna tur hian Disaster Managemen & Rehabilitation Mamit atangin chhawmdawlna Rs 1,30,000/- dawn a ni a, YMA in vehbur khawnin pawisa fai leh thil hrang hrang mi inphal ten an pe khawm a ni.
Pi Awii In sak that a nih theihna tura thilpek petu zawng zawng chungah Hmarveng Branch YMA chuan lawmthu a sawi a ni.
Hetihlai hian, Ni 5/5/2024 Pathiani zana Lungsir Venga Pi R. Lalfakawmi In kang pawh sak that a nih theihna turin YMA leh khawtlang hruaitu ten ruahmanna siam chhoh mek a ni a, DM&R atanga chhawmdawlna awm thei buaipui mek niin veng chhungah tukin atang khan vehbur khawn a ni a, chhawmdawlna leh thilpek hmanga In sak hna thawh ngai a nih avangin chak taka hmalakna kalpui rum rum theih a nih loh thu Lungsir Branch YMA hruaitute hnen atanga Mamit Times thudawnna chuan a sawi.
0 Comments