Nimin khan DC Conference Hall, Mamit-ah Special Intensive Revision of Photo Electoral Rolls,2026 neih zawh taka Final Electoral Roll chu Pu Suvigya S Chandra, District Bawrhsap leh District Election Officer ni bawk chuan a tlangzarh.
District Election Officer chuan he final electoral roll tluang taka tlangzarh a ni thei chu lawmawm a tih thu a sawia, hemi hlawhtlinna kawnga hmalatu election officials te, NGO leh khawtlang hruaitute leh political party te hnenah lawmthu a sawi. Pu Suvigya S Chandra chuan he SIR 2026 kalpui chhung hian Mamit district-ah khaw chhia leh harsatna tam tak tawk mah ila mahni mawhphurna kan hlenchhuak thei leh thawhhona tha kan nei chu lawmawm a tih thu a sawi.
Pu Lalnunfela Chawngthu, Election Officer chuan lawmthu sawiin he revision hi officials tam zawk tan pawh thil thar a ni a, hemi kalpui chhunga thawhhona tha NGO hruaitute leh political party nen an nei thei chu lawmawm a tih thu a sawi.
Final Electoral Roll tlangzarh takah hian Vote nei mipa 32,775 leh hmeichhia 32,501 an vaiin mi 65,276 an awm a, draft roll tarchhuah atanga vote nei punna hi 959 niin hei hi 1.491% a ni. Mamit District chhunga voter tlemna ber chu 2-Dampa Constituency huam chhung Zopui Polling Station a ni a, voter 23 an awm a ni. Vote nei tamna ber Polling Station hi 3-Mamit Constituency huam chhung New Mamit polling station niin voter 1,067 an awm thung a ni.
Mamit District chhungah polling station 122 awmin Constituency pathum 1- Hachhek-ah 20,737 voters an awm a, 2-Dampa-ah vote nei 20,235 awmin 3-Mamit-ah mi 24,304 vote nei an awm bawk. Polling station pakhatah vote nei 535 zel awm ang a ni a. Service voter 301 an awm bawk a ni.
0 Comments