Ni 4/9/2026 khan DC Confererence Hall (LAD Building) ah Pi Carolyn L.B.Khiangte, Dy District Election Officer hovin SIR Final Electoral Roll Ni 7th September, 2026-a tlangzarh tur chungchang thlirzauna tlawmngai pawl aiawh, political party leh thutharthehdarhtute nen neih a ni.
Thutkhawm kaihruaitu Pi Carolyn L.B.Khiangte chuan SIR kalpui zawh takah officials, tlawmngaipawl leh khawtlang hruaitute nen thawhhona tha tak hnuaia kalpui a ni chu lawmawm a tih thu sawiin, hna hautak leh huphurhawm tak ni mahse thawhhona tha tak hnuaia zawhfel a ni chu a lawmawm takzet a ni a ti a, hmabak zelah pawh thawhhona tha tak an neih chu chhunzawm pui zelah a sawm.
SIR final electoral Roll zawhfel takah hian Mamit District chhung constituency pathum 1-Hachhek ah mi 4004 hearing-ah 232 paih an ni a. 2-Dampa-ah mi 3792 hearing niin mi 323 paih an ni, 3- Mamit-ah hearing mi 5396 ah 338 paih an ni bawk. Hearing hi 2005 kum rinchhana neih niin hetah hian an thlahtute atanga chhui an ni a, paih takte hi mitthi tawhte leh hmundanga vote nei tawhte bakah tehfung atanga chhuta tun thlenga document chhui tur nei mumal lo te an ni a, hearing kalpuina kawngah uluk taka kalpui a nih bakah Roll a chuang turte an chuan ngei theih nana felfai taka kalpui a ni. SIR revision kalpui zawh takah hian 1.7.2008 a piang chinte tehfunga a hman a ni bawk.
0 Comments