Hun kal tawhah, Mizoram chhunga dan loa sumdawnna kalpui titawp tura hmalakna kawngah harsatna a awm thin a, khami chungchangah khan kan ram hruaitu ten “mit an siai thu” an sawi tawh a, mipui leh political party hrang hrang ten nasa takin kan demrawn a nih kha.
Kan vawiin hun hman mekah, tun hnai lawkah, hmasawnna hnathawh hrang hrangah “maimitchhin deuh ngai a tam thu” kan CM meuhin a sawi leh a, kan sawrkar enkawl kawnga mawhphurhna neitute tawngkam chhuak, an tih duh zawng, an kal dan hrang hrang kan hmuh leh kan hriat thinte ngun taka ngaihtuah hian mipui min dah hniam hle em ni (?) tih zawhna a awm thei a, a beidawn thlak lek lek thin.
“Mit siai” leh “Maimitchhin deuh ngai” hi enge a danglamna ngaihtuah ila, thil thuhmun rengah tawngkam danglam deuh kan hmang mai a ni lawm ni ? “Kan dinhmun, kan nihna leh mawhphurhna kan koa tla a danglam ang zela tha leh tha lo kan tehna a danglam thin” kan tih fo thin kha a la pangngai reng a ni. Heng zawng zawng hi sual vulh lenna, pawisak nei lo tura mi rilruah zau taka kawng hawnna hmanrua, kan state in hma a sawn vena tur kawnga kan than-mawh-bawk vek a ni. A engamah hi a lem chuang lo e.
Ram pum huap nilo, Mamit District chhunga hmasawnna hnathawh hrang hrang kan kalpui dan, hna thawh lian tham zawng zawnga mi 2/1 hming ni deuh vek te, khawtlang hmasawnna tura hmalakna kawngah, khawtlang hruaitute hnena hna sem sawm dan rualkhai lo lutuk nia langte hi ngaihtuah zui ngai a ni. Veng tin leh Village Council tin hian hmasawn tumin theih tawp an chhuah vek a, hmasawnna hna hrang hrangin thlen tam bikna hmun leh thlen ngai meuh lona hmun a nei nia ngaih theihte hi siamthat ngai a ni.
A-tua-te-mah hi tha famkim kan awm lo. Tihsual leh dai pelh chang awm thei a ni. Chutihrual chuan, mipui rilrua beiseina sang tak tuh zet a,beidawnna khura hnuk luttu mai kan ni ang tih erawh a hlauhawm thei awm e.
Mizo mipui nawlpui zingah mi tha, thil tha duhna a lian hle tawh a, Politics kan hmuh dan leh hriat dan a danglam hle tawh bawk. Chu chu kum 2023 inthlanpui result khan a tichiang a ni. Nghet tak leh mawl taka party pakhat vuan tlut lote thutlukna hian nasa takin thil a tidanglam thei tih Political party hrang hrang hian an theihnghilh loh a tul tak zet. Ram changkang zawkte anga tha lo hnawla a tha zawk zawn kawngah mizo mipui kan harh chhuak mek a ni si a.
0 Comments