Phaizau khuaa Tlawmngai Pawl hrang hrang hmalaknain an khaw sikul Upper Primary School chu nimin atang khan tiam chin awm loa khar a ni a, khar chhunzawm zel a nih rih tur thu kan thudawnna chuan a sawi.
Mamit District-a Phaizau All NGO-in an khaw Upper Primary School-a zirtirtu hmun danga thawkte an khuaa thawk tura phutin nimin atangin tiam chin awm loin sikul an khar a, kawng an zawh bawk.
Phaizau All NGO hian Phaizau Vengchhak atanga kawng zawh tanin Upper Primary School thleng kawng hi an zawh a ni. He an kawng zawh leh UPS School khar hian awmzia a nei lo a nih chuan tun aia na zawkin All NGO leh Phaizau mipui ten a tul anga hma lak zel an tum tih an sawi.
Phaizau UPS zirtirtu atana Sorkarin a dah mi 4-te chu Phaizau UPS-ah hian thawk loin, hmun dangah an thawk a, tun dinhmunah zirtirtu pathum an awm mek ni-a sawi a ni a, hei vang hian Phaizau UPS chu zirnaah nasa takin a tlak hniamphah a, Phaizau UPS-ah hian tun dinhmunah zirlai mipa 7 vel chiah an neih phah bawk ni-a sawi a ni.
Hemi chungchanga Mamit Times zawhna chhangin Pu K. Lalnunfela DEO Mamit/DPC Samagra Mamit District chuan ram pumah zirtirtu indaih lohna tiziaawm turin sawrkarin hma a la reng a, vawi khata a zawng zawng tihfel duak duak theih a ni lo tih a sawi. Phaizau UPS harsatna tawh chungchang hi a hnenah mumal taka thlen leh sawiho a awm loh laiin anmahni zak Phaizau khuaa kala tlawmngai pawl hrang hrangte kawma hma an lak thu a sawi a, Phaizau All NGOs ten Minister hnen lama an hmalakna zawng zawng erawh an hriat ve vek loh thu a sawi bawk.
Hetiang thilah hian a tuartu chu zirlaite an nih avangin, zirlaite hmakhua ngaia an harsatna chinfel tuma dawhkan khat kila sawiho theih nise a duh thu a sawi bawk. Hetihlai hian, Mamit District chhunga zirtirtu indaihlohna tiziaawm turin Casual Teacher post 40 pek belh/thar an nih thu DEO chuan a sawi.
Tun dinhmunah, Mamit District chhungah UPS 27 chu zirtirtu pakhatin an enkawl mek a awm a, Mamit District atanga hlawh la, hmun danga hnathawk zirtirtu 150 dawn an la awm tih Pu K. Lalnunfela, DEO/DPC Mamit District chuan a sawi.
0 Comments