MAMIT DISTRICT MJA MEMBER TEN NATIONAL HIGHWAY DIVISION I SDO AN KAWM

 

Mizoram Journalists’  Association, Mamit District memberte chuan nizan (23/4/2026) khan Pu PC Zohmingsanga, SDO NH Division I kawmin Mamit District chhunga inkalpawhna kawngpui hrang hrang hnathawh mek leh hmachhawp awmte dinhmun an sawipui.

Mizoram Journalists’ Association Mamit District memberte chuan nizan (23/4/2026) khan Pu PC Zohmingsanga, SDO Natuional Highway Division I chu a chenna quarterah kawmin Mamit District chhunga inkalpawhna kawngpui pawimawh tak tak hnathawh mek leh hnathawh tura hmachhawp awm mek dinhmun leh thlenchin an sawipui a, District MJA chuan National Highway Division I chu Mamit District chhunga inkalpawhna kawng an siam mek leh siam turah thanemngai taka thawka, rotling leh chhawr tlak hmasawnna hnutchhiah ngei tura an beisei thu sawiin theih tawp chhuah turin an ngen.

Pu PC Zohmingsanga SDO PWD Highway Division I chuan kawngpui tha a awm theihna tura theih tawp chhuah an tum thu sawiin hnathawktute anmahni ringawta en leh vil hneh loh an neih ve fo thu a sawi a, mipui leh tlawmngai pawl hrang hrangte inpawh taka thawhhopuiah a sawm tih a sawiin, fello lai inkawhhmuh leh thil tha zawk tur a nih chuan thurawn inpek leh infinchhuah hreh lo turin mitin a ngen.

SDO NH Division I chuan Bairabi leh Mamit inkar kawng chu STMC hmanga thawm mek a nih thu a sawi a, hei hi NH Division I leh III te enkawl niin STMC hmanga kawng thawm hna hi NiDHI Creative Infrastructure Pvt Ltd ten an thawk mek tih a sawi.

National Highway 44A/108 hnathawh zawh loh thawh zawhna tura ruahmanna siam pawh chak taka bawhzui a nih laiin tun dinhmunah Contractor atana thlan pawmna lehkha an la hmuh loh thu Pu Zotea chuan a sawi.

Hetihlai hian, NH 44A/108 chhe zual lai thawm that hna hi Short Term Maitainance Contract hmangin NiDHI Creative Infrastructure Pvt. Ltd ten an thawk mek a, he hna hi hlawm (pakage) thumah then niin hnathawhna turin cheng vaibelchhe kua vel ruahman a nih thu SDO PWD NH Division I chuan a sawi a ni.

National Highway 44A/108 in a kalsan, kawng hlui thawm thatna tur (One Time Improvement) hnathawk tur tihfel a nih tawh thu sawiin, he hna hi Hindustan Engineers Syndicate (HES) Infra Private Ltd ten an thawk dawn a, March 2026 khan hnathawhna tura tul ang tihfel niin hnathawh hun chhung atan September 2026 thleng hun an neih thu a sawi a, tun dinhmunah hna erawh an la tan lo thung. Kawng hlui thawm that hna thawhna tur hian  cheng vaibelchhe sawmhnih pasarih  ruahman a nih thu Pu Zotea chuan a sawi.