Mamit tlaklam, Vaiza rama Bawlhhlawh sawngbawlna tur hnathawh mek chu nimin khan Mamit District MJA member ten an tlawh a, hnathawh kal mek leh hmachhawpte an en.
Urban Development and Poverty Alleviation Department ten Mamit khawpui bawlhhlawh senghawi leh sawngbawlna tura an ruahman, Mamit tlak lam Vaiza rama hnathawh kal mek leh hmachhawp awmte nimin khan Mamit District MJA member ten a hmunah an tlawh a, District Urban Development Officer Pu Lalthuama leh hnathawktu Pu H. Vanlalhlua te nen an inkawm bawk.
Mamit khawpui bawlhhlawh sawngbawlna tur hi Mamit tlak lama Vaiza fram (Hmawngkawn bul) ah siam a ni a, hun engemaw chen hnathawh chawlh lailawk a nih hnuin tunah hian chhunzawm mek a ni. Tuna hna kal mekin a ken tel hi bawlhhlawh chi hrang hrang sawngbawlna/thliar hranna tur building (Material Recovery Facilities), Tui chhekkhawlna (Water Storage Tank 20000lts capacity), Bawlhhlawh tawihthei sawngbawlna building awmsa chei that, Site Office building, Chowkider qtr leh bawlhhlawh sawngbawl tawh bukna tur (weighing bridge platform) te niin heng zawng zawng siamna tur hian cheng nuai za sawm hnih pahnih, sing ruk sang thum zali leh sawm (Rs 122,63,410) ruahman a ni a, hna hi Kum 2025 December Ni 18 atang khan thawh tan niin thla sawm hnih pali (kum hnih) chhunga thawh zawh tura tih a ni.
Material Recovery Facilities building sak mekah hian hmanrua hman tura ruahman ang taka hman a nikh thu leh hnathawh pawh a tha viau nia an hriat thu sawiin, tha tak leh rinrlaka hnathawh a nih theih nan theih tawp chhuahin an vil reng tih he hnathawh viltu UD&PA Engineer te chuan an sawi.
Tun dinhmunah he hna thawh mek hi za zela sawmhnih (20%) vel thawh zawh tawh anga chhut a ni a, hun tiam chhunga thawh zawh hman ngei beisei a nih thu hnathawktu Pu H. Vanlalhlua leh hnathawh enkawltu District Urban Development Officer Pu Lalthuama te chuan an sawi.
0 Comments