Mizorama Jail hrang hrang 11-ah mi tang 1,664 an awm a, lungin a leng zat (jail capacity) aiin mi tang 485 in an tam zawk a ni.
Hetihlai hian Mamit District Jail mi 96 tan theihna ah tun dinhmunah mipa 63 leh Hmeichhia 4 an vaiin mi 67 an tang mek a, tang awm thei zat aiin mi 26 in tang an tlem a ni.
Mizoram prison department in a chhinchhiah danin, January ni 10 thleng khan Mizorama lungin hrang hrang 11 ah mi tang 1,664: mipa 1,466, hmeichhia 185 leh an fate naupang 13 an awm a. Central Jail Aizawlah tang tam berin mi 480 awmna turah mi 843 an tang a, a leng zat aiin 363 in an tam zawk a ni. District Jail Champhai in dawtin, mi 105 lennaah mi 149 an tang a, a leng zat aiin 44 in an tam a, District Jail Aizawlah tang 90 lennaah mi 122 an tang a, a leng zat aiin 32 in an tam a. Women’s Jail, Aizawlah mi 96 lennaah mi 127 an tang a, a leng zat aiin 32 in an tam a. District Jail Lungleiah mi tang 109 lennaah mi 123 an tang a, a leng zat aiin 14 in an tam zawk a ni.
Hetihlai hian District Jail Saitualah tang pakhatmah an awm lo thung a, District Jail Serchhip, Mamit, Lawngtlai, Kolasib leh Siaha ah te pawh tang leng zat aiin tang an tlem zawk a ni.
Mizoram chhunga Jail hrang hrangah dam chhunga a tang tur (lifer) mi 55 an awm mek a ni.
0 Comments