LUNG (BOULDER) HMUH LOH VANGIN KAWNG THAWM HNA THAWH THEIH LOH

 Mamit leh Bairabi inkar kawngpui chhe zual lai thawm tha turin hnathawktute chuan an mamawh leh duh ang Lung (Boulder) lei tur an hmu lo niin an sawi a, Lung lakna hmun (quarry) neitu thenkhat chuan an lung man an hmuh that theih loh vanga lung pe thei lo niin an insawi ve thung.

Mamit-Bairabi inkar kawng chuan tun dinhmunah  ziaawm lam a pan thei rih lo a, kawng chhe zual lai siamtha turin hnathawh hleih theih a ni lo.

He kawng pawimawh tak hi mipui nitin mamawh chak lakna a nih avangin ngaihpawimawh ngai a ni a, chutihlai chuan kawng thawm that hleih theih loh vanga lirthei tana tlan harsa, lirthei tan fona hmun engemawzatah a la awm a ni.

He kawngpui hi Mizoram PWD Highway Division I & III ten an inenkawl sem a ni a, Mamit atanga Damdiai thleng hi Division I enkawl niin Division III hian Damdiai leh Bairabi inkar an enkawl tel thung.

Tarlan tawh thin angin Division I enkawl huam chhung, Vawngawnzo hnaihah kawng chhe zual hmun hnih/thum velah a awm a, heng kawng khuar zuallai hnawh tur hian a hnawhna tur lung (boulder) duh ang an hmuih theih loh thu hnathawktute chuan an sawi.

Hetiang bawk hian Division III enkawl chin, Damdiai leh Suarhliap inkarah lirthei tan deuh ziahna hmun a awm bawk a, hei pawh hi a hnawhna tur lung (boulder) an neih mumal loh thu a enkawltu Division III hnen atanga kan thudawnna chuan a sawi a ni.

Hetihlai hian, Mamit khaw mi, Lung lakna hmun (Quarry) neitu thenkhat chuan Lung (Boulder) hi phurh chhuah tur an neih thu leh hun kal tawhah an lung (Boulder) man an hmuh that thin loh vanga pe thei lo an nih thu an sawi ve thung.

Mamit leh Bairabi inkar kawngpui hi National Highway No 6 (Spur) a puan a nih hnu leh MPWD Highway Division kuta hlan a nih hnua a vawi khatna turin he kawngpui siamthatna tur hian MoRTH chuan cheng nuai 433 a ruahman a, ruahman ang chuan he sum hmang hian kawng chhuat chhe zual lai siam rual, WBM 150mm a chhah siam leh black topping (Bitumen) tihtur a ni.

He hna hi Ni 9/March/2024 atanga thawh tan anga ngaih niin kum khat chhung thawh tura tih a ni.

He kawngpui thawm that hna thawk tur hian chhangtu an awm loh avangin MPWD(NH) ten NIHDI Creative Infrastructure Pvt. Ltd hmingin an chhanga, sum lo kal hi hmun thumah - Company, MPWD Division I&III hnenah semsawm ngai niin tun dinhmunah sum pek chhuah tur hnuhnung ber (Final instalment) chiah hmuh tur a awm tawh niin thu dawnna chuan a sawi.